Rencontre avec Manuel Valls : communiqué de Gilles Simeoni et Jean-Guy Talamoni
(A redazzioni d'Alta Frequenza) - In un cumunicatu cumunu, Gilles Simeoni è Ghjuvan Guidu Talamoni voltani cù calchì ditagliu in più annant'à u scontru di luni in Parighji cù u Prima ministru. Ùn si tratta micca di un resu contu sanu di ssu scontru cù u rispunsevuli u più altu di u Statu, ma i dui presidenti di l'Assemblea di Corsica vani più in là in a riflessioni nant'à ciò chì s'hè passatu ssu ghjornu quì. Ci sò bè dui parti bè pricisi chì spuntani dopu à ssi discussioni : a prima, diciaremi pusitiva, è a siconda, dimula dinò, piuttostu negativa. U prima puntu liatu à a situazioni ecunomica di l'isula pudaria entra in a parti uttimista di ssi scambii ; s'hè parlatu in fatti di u PEI, di i fondi aurupei, di a PPE, di u Padduc, di a furmazioni, di un pianu contr'à u disimpiegu. Pari chì annant'à tutti ssi prublemi, punti di cunvergenza pudariani nascia cù u guvernu. Inveci, pà l'altra parti, quilla chì cuncerna i quistioni pulitichi, o ancu cù una dimensioni custituziunali, pari chì l'affari sighini in francesi. Lingua corsa, fundariu è lotta contr'à a speculazioni immubiliari, istituzioni, fiscalità, intercumunalità : tutti i rivindicazioni ricullendu da l'isula ver di u guvernu liati à ssi punti essenziali ùn sò micca stati percepiti troppu bè in Parighji. È ùn parlemi micca di a prublematica di primura di i prighjuneri pulitichi è di l'annistia, chì hà ricivutu si sà a risposta propiu secca di u guvernu. Ss'ultima quistioni, compiini Gilles Simeoni è Ghjuvan Guidu Talamoni, duvarà pudè essa amintata cù sirenità in un tempu utuli, parchì a ripetini i dui presidenti di a CTC, ani ricivutu par quissu un mandatu da l'alittori.
