Rencontres à Ajaccio après les incidents de Noël : le sentiment de Jean-Guy Talamoni
(A redazzioni d'Alta Frequenza) - Ghjurnata carca oghji torna (luni) pà ciò chì tocca a situazioni di tinsioni ch'ella cunnosci a Corsica è Aiacciu in particulari dipoi a famosa notti di Natali 2015. Ghjurnata carca parchì a raprisintazioni pulitica di l'isula a più alta, a Cità d'Aiacciu è u Dipartimentu di Corsica Suttana, aviani dui appuntamenti assai impurtanti ssu luni : cù i spinghjifochi prima eppo cù a cumunità musulmana dopu. In fin di matinata, Ghjuvan Guidu Talamoni è Gilles Simeoni sò ghjunti in u centru di succorsu d'Aiacciu cù Laurent Marcangeli è Pierre Jean Luciani. Davanti una mansa di ghjurnalisti, è ancu a televisiò russia, a dilegazioni s'hè intattinuta cù i spinghjifochi di Corsica Suttana. Una riunioni senza a stampa hè stata urganizata dopu cù, è hà criatu a sinsazioni, una dilegazioni di a cumunità musulmana. U sicondu tempu forti di a ghjurnata hè statu in a famosa sala 2 di l'Assemblea di Corsica. In fatti, u dispusitivu pulizzeru assai impressiunanti in postu in i Jardins de l'Empereur rindia difficiuli un scontru sirenu è pusitivu trà a raprisintazioni pulitica è i raprisintanti di a cumunità musulmana. Ghjuvan Guidu Talamoni è Gilles Simeoni ani dunqua invitatu à l'Assemblea di Corsica i raprisintanti di ssa cumunità, è l'imam di a sala di prighera chì hà cunnisciutu disguasti. Nanzi à un scontru fora di i sguardi di a stampa, tutti i raprisintanti si sò filicitati di u spiritu custruttivu chì tuttu ognunu vulia metta in ssa riunioni. Si ritinarà par asempiu dopu à ssu scambiu l'infrasata di Gilles Simeoni chì hà dittu "Seti quì in casa vostra, è quandu seti tocchi, semi tocchi noi".
Steti à senta à Ghjuvan Guidu Talamoni, ghjustu nanzi à u principiu di a riunioni in u centru di succorsu d'Aiacciu.
Sur le même sujet
