Rentrée sur une vague d'indépendance en Europe pour Corsica Libera
(A redazzioni d'Alta Frequenza) - Ssu luni, Corsica Libera hà fattu a so riintrata pulitica cù un custatu cintrali : a sucità corsa ùn hè mai stata cusì pronta à trattà di manera seria l'ipotesi di l'indipendenza. In fatti, pà u partitu, u prucedimentu di sparghjera di a credibilità di ssa pussibilità pà a Corsica hè andata più in furia ss'ultimi mesi, trà l'accunsentu inghjiru à a necessità di una riforma istituziunali è u fattu di veda omi pulitichi hè vera upposti à l'indipendenza, ma chì ùn la cunsidareghjani più com'è un'idea micca riali o ancu com'è una tuntia, ma bè com'è un'ipotesi chì ùn ci voli micca à schisà par via di i difficultà rilaziunali cù u Statu. Dinò, u fattu di veda a quistioni di l'indipendenza in prima ligna in Scozia cù u referendum di ssu ghjovi, è in Catalogna di nuvembri dà torna appena di più spiranza à Corsica Libera, ancu s'è a quistioni di l'integrazioni à l'Unioni Aurupea di ssi stati novi pussibuli ferma difficiuli, trà quilli chì cunsidareghjani chì paesi chì pighjani a so indipendenza ma chì appartenini dighjà à l'Unioni Aurupea sariani membri di dirittu, è quilli chì ghjudicheghjani ch'elli duvariani passà torna pà un prucedimentu classicu d'adesioni à l'unanimità di i stati membri.
Steti à senta à Ghjuvan Guidu Talamoni pà Corsica Libera.
