Reprise de la SNCM : Baja Ferries confirme ses intentions
(A redazzioni d'Alta Frequenza) - In un cumunicatu ghjuntu ind'a nostra redazzioni, Baja Ferries cunfirmeghja ch'ellu hà trasmessu à u Tribunali di Cummerciu di Marseghja un'ufferta glubali pà a ripresa di l'attività di a SNCM. Un'infurmazioni cumunicata calchì ghjornu solu dopu à u ritiru difinitivu di u gruppu Stef, chì avia fattu un'ufferta cumuna cù l'armatori di Baja Ferries, Daniel Berrebi. "Ss'ufferta cuncerna u serviziu marittimu di a Corsica, a missioni d'agenti generali pà parechji armamenti, l'attività d'intrattenu è di mantinenza di i battelli è l'attività cù u Maghreb." "Includi a ripresa di 750 impieghi è l'acquistu di i battelli Pascal Paoli, Jean Nicoli, Paglia Orba, Monte d’Oro, Daniel Casanova è Méditerranée pà un prezzu tutali di 15,2 millioni d'auri. Ss'ufferta ùn hè liata à nisun cundizioni", cuntinueghja u cumunicatu. "T'avemi pà i servizi di a Corsica è di u Maghreb scopi ambiziosi, è vulemi, tinendu di manera durevuli a bandera francesi annant'à tutti i battelli, offra un serviziu di cuntinuità tarrituriali sicuru è di qualità eppo ritruvà parti di marcatu annant'à ligni chì t'ani un putenziali forti", compii Daniel Berrebi.
