Réunion de Paris : nouvelle occasion idéale de faire remonter un discours politique précis et net
(A redazzioni d'Alta Frequenza) - Hè stamani (luni) à 11 ori chì Bernard Cazeneuve è Marylise Lebranchu ani da riceva l’eletti di a Corsica ind’u quadru di una riunioni impurtantissima, quilla annant’à a riforma istituziunali in Corsica. U gruppu Communistes et Citoyens du Front de Gauche chì avia postu una dumanda annant’à ssu prublema à l’Esecutivu hà dicisu, postu chì a riposta chì l’hè stata data ùn li cunvinia micca, d’ùn andà micca à ssa riunioni. Ramintemi chì ssa risposta hè stata più cà chjara : l’assemblea di Corsica ùn hà micca à dumandà di vultà annant’à u famosu articulu 13 di a legi NOTRe chì privedi, ramintemula dinò, a suppressioni di i dui dipartimenti di Corsica è a criazioni di una cullittività unica. A dilegazioni corsa sarà cumposta di i presidenti di gruppi di l’Assemblea, i parlementarii, i presidenti di i cunsighji dipartimintali è da i merri d’Aiacciu è di Bastia. Si sà dighjà chì trè punti di primura sarani trattati duranti ssa riunioni : u famosu articulu 13 di a legi NOTRe chì prisenta i mudalità di una cullittività unica, a manera di vutà à l’assemblea di Corsica, è a famosa prima chì crea sempri prublemi, eppo infini a raprisintazioni tarrituriali cù u cunsighju di i tarritorii sempri cusì iputeticu. Cù chì spiritu i sfarenti forzi pulitichi di l'isula vani in Parighji ? Pà Corsica Libera, ùn si pudia mancu appena ricusà d'andà à ssa riunioni, parchì hè torna un'uccasioni ideali di fà ricullà in Parighji un discorsu puliticu francu è chjaru.
Steti à senta à Ghjuvan Guidu Talamoni.
