Réunion du comité stratégique : la réaction de Femu a Corsica
(A redazzioni d'Alta Frequenza) - Una cullittività unica diretta da un'assemblea d'86 membri spartuti in dui culleghji, duvaria essa l'architettura futura di l'urganisazioni tarrituriali di l'isula. Ss'86 cunsighjeri sariani spartuti in dui culleghji dunqua, un prima di 43 cunsighjeri eletti ind'a circuscrizzioni tarrituriali, è un sicondu culleghju dittu "di i tarritorii", custituitu da 23 cunsighjeri di Corsica Suprana è 20 di Corsica Suttana. Si "guadagnaria" 16,5% annant'à u tutali di l'eletti, 86 dunqua contr'à 103 oghji. U trasferimentu di i cumpitenzi di i dipartimenti ver di a cullittività nova si pudaria fà senza troppu difficultà : reta stradali, trasporti micca urbani è sculari, fochi, accunciamentu di u tarritoriu, ambienti o porti dipartimintali pudariani passà da l'autorità dipartimintali ver di quilla di a cullittività di Corsica. Di manera glubali, tuttu ss'affari si duvaria fà senza delucalisazioni di i servizi è dunqua senza cunsiquenzi maiò pà i parsunali. Ferma solu u prublema di a cumpitenza suciali è sanitaria, è parechji pussibilità sò studiati quì. I riazzioni arrighjistrati arisera dopu à ssa riunioni erani piuttostu pusitivi. U gruppu Femu a Corsica era cuntentu, ancu s'è a quistioni di u fattu di rimandà l'alizzioni dipartimintali di marzu chì veni ferma prisenti.
Steti à senta à Ghjuvan Cristofanu Angelini.
