SCB - ACA : informations pratiques
(A redazzioni d'Alta Frequenza) - Dopu à una riunioni in prifittura di Corsica Suprana issu ghjovi, u Sporting Club di Bastia hà fattu cunnoscia calchì misura pà u derby contr'à l'AC Aiacciu, issu sabbatu à 8 ori. Fora di a circulazioni di i vitturi è di i parsoni bluccata, davanti à a tribuna Nord da 5 ori è 45 à 6 ori è 30, ciò chì era dighjà u casu contr'à Nizza, l'intrata in tribuna Ouest si farà pà trè lochi sfarenti, s'è omu hè sustenidori di u Sporting o di l'ACA. I sustenidori di u Sporting intrarani pà a porta ouest-nord, mentri chì quilli di l'ACA intrarani elli pà dui porti cantu Ouest-Sud. Ghjustu appuntu, ci sarani dui zoni di sustenidori pricisi in tribuna Ouest. U primu, abituali, hè di 440 piazzi dighjà vinduti dipoi parechji ghjorni. U sicondu ellu hè statu autorizatu da a prifittura di Corsica Suprana. Pudarà cuntena 277 sustenidori di l'ACA à u più. I piazzi pà quissu quì sarani in vendita ind'u kiosque daretu à stela di u ricordu di u 5 di maghju di u 1992. I sustenidori di l'ACA avendu dighjà cumpratu a so piazza in tribuna Ouest o ind'un'antra tribuna pudendu scambià u so bighjettu pà integrà issa siconda zona. Infini, sarà impussibuli pà un sustenidori essendu ind'a prima zona d'andà ind'a siconda è l'affari và dinò à l'arringuerciu.
Sur le même sujet
