Senatoriales : en Haute-Corse la Gauche partira divisée
(A redazzioni d'Alta Frequenza) - Mentri chì u 28 di sittembri, a Corsica sarà cuncirnata da i senaturiali pà i dui dipartimenti, in Corsica Suprana, induva u senatori attuali François Vendasi ùn si raprisintarà più, l'affari movini. Mentri chì dipoi parechji sittimani, Anne Marie Natali s'hè dichjarata candidata à diritta senza sapè par avà s'ella hè stata investita di manera ufficiali da l'UMP postu chì altri candidati di diritta si pudariani dichjarà, à manca, a divisioni hè oramai quì. In fatti, mentri chì Jacky Padovani, candidatu pussibuli dipoi un pezzu ùn hè ancu à dichjarassi di modu ufficiali è chì Joseph Castelli, presidenti di u Cunsighju Ginirali di Corsica Suprana, pudaria avè l'investitura ufficiali di u Partitu Radicali di Manca da quì à calchì ghjornu, un antru candidatu hè spuntatu senza chì nimu s'aspittessi à què. In fatti, u cunsighjeru esecutivu Petru Ghionga hà ufficializatu a so candidatura, senza partitu, ciò chì faci chì i carti sò stati distribuiti di novu à manca, Petru Ghionga raprisintendu un currenti più prugressistu di pettu à quillu purtatu da Jacky Padovani, chì ùn faci micca malgradu tuttu a spiccanza com'è altri parsunalità di manca cunservatrici di Corsica Suprana. Una senaturiali chì s'annunzia indecisa, postu chì a diritta si senti megliu à u nivellu di u numaruu di grandi alittori, è u currenti naziunalistu muderatu t'hà pà a prima volta un pesu quantunqua impurtanti cù i grandi alittori arricati da l'alizzioni di Gilles Simeoni è di una parti di a so lista d'unioni pà a merria di Bastia, à tal puntu chì una candidatura di ssu currenti pudaria essa dichjarata da quì à pocu.
Steti à senta à Joseph Castelli, chì ci cunfirmeghja a so candidatura.
