SNCM : la DSP est bien transmissible pour Paul Giacobbi
(A redazzioni d'Alta Frequenza) - Paul Giacobbi hà prisintatu oghji (luni) duranti una cunfarenza di stampa u bughjettu primitivu 2015, quillu di a CTC ben intesu. U presidenti di l'Esecutivu hà parlatu di un equilibriu bughjettariu assicuratu malgradu i calati di l'aiuti di u Statu; ci vultaremi ind'i nostri nutiziali chì venini. Paul Giacobbi hà vulsutu vultà dinò nant'à a situazioni assai difficiuli in ssu mumentu di a SNCM. Nanzi à a manifistazioni di vennari davanti a prifittura è l'Assemblea di Corsica, una manifistazioni urganizata da u Front de Gauche è a CGT, u presidenti di l'Esecutivu aspetta sempri una risposta chjara di u ministru di i Trasporti. Duvaria parlà ssu marcuri in fatti di a situazioni esatta di l'intrapresa in ssu mumentu è di u famosu prublema di a trasmissibilità di a dilegazioni di serviziu publicu. Ramintemi chì Paul Giacobbi hà dittu parechji volti ch'ella era pussibuli quissa quì, ma ci si pari chì a pusizioni di u ministru ùn sighi micca troppu listessa di pettu à a soia. Aspittendu d'avè di più pricisioni, Paul Giacobbi hà fattu sapè torna una volta ciò ch'ellu pensa di ssa quistioni : "iè, si pò trasmetta ssa dilegazioni".
Steti à senta à Paul Giacobbi.
Sur le même sujet
