SNCM : la position de l'Etat est scandaleuse pour la CGT de Haute-Corse
(A redazzioni d'Alta Frequenza) - U tribunali di cummerciu di Marseghja hà dicisu oghji (marti) di dà a so dicisioni vennari chì veni cuncirnendu l'avvena di a SNCM. Duranti l'audienza d'oghji, u ghjudici inchiestadori sceltu da u tribunali hà cunclusu à a rialtà di u fallimentu. U tribunali di cummerciu t'hà a scelta trà prununzià a liquidazioni di a SNCM o mettala in addirizzamentu ghjudiziariu pà una durata trà dui è sei mesi chì poni essa rinnuvati. I ghjudici poni ricusà dinò a dumanda di fallimentu s'elli stimani chì a tisuraria di a cumpagnia basta pà parmettali di cuntinuà a so attività. Hè pussibuli chì un'antra prucedura ghjudiziaria t'avissi cunsiquenzi impurtanti annant'à l'evuluzioni di u cartulari. In fatti, u tribunali di grandi istanza di Nanterre hà da asaminà dumani (marcuri) un ricorsu chì pudaria renda vana a bancarotta di a cumpagnia. Da un'antra banda, un'adunita hè stata urganizata ssu marti dopu meziornu davanti i lucali bastiacci di a cumpagnia da a CGT è u Partitu Cumunistu. Cù ssa nutizia chì hè ghjunta da a cità fuceana, l'ambienti hè divintatu più pisivu à mezu à i parsunali di a cumpagnia. Ma da quì à a dicisioni ufficiali di vennari, si camparà ghjurnati d'incertezza. Ed hè a collera chì hè suprana ind'a CGT, par via di u cumpurtamentu di u Statu in ssu cartulari, chì hè par ella un scandalu.
Steti à senta à Antoine Mandrichi pà a CGT di Corsica Suprana.
