SNCM : le bricolage continue, selon le STC
(A redazzioni d'Alta Frequenza) - U tribunali di cummerciu di Marseghja ùn hà micca asaminatu arimani (marcuri) dunqua i trè ufferti di ripresa di a SNCM. Di pettu à ufferti chì ùn cunviniani micca, senza "nisun guaranzia pà l'impiegu", è cunsidarati ancu com'è di pocu valori da l'amministratori ghjudiziari di a cumpagnia, u prucuratori hà dumandatu a prulungazioni di u tempu d'adirizzamentu ghjudiziariu fin'è a fin di u mesi di sittembri. Hà dumandatu dinò ch'ella ci sighi una nova chjama à l'ufferti. Pà u tribunali, l'ufferti attuali sò debbuli à u nivellu finanziariu, mancani di soldi ghjunghjendu direttamenti da a stacca di i candidati è t'ani cundizioni suspensivi, com'è una liata à a Cumissioni aurupea, ancu pronta à caccià i cundanni chì pesani annant'à a SNCM di 440 millioni d'auri. A dicisioni di u tribunali di cummerciu di Marseghja sarà cunnisciuta da quì à una quindecina di ghjorni. Pà ciò chì tocca i riazzioni, a CGT hè andata in u sensu di l'istituzioni ghjudiziaria, dicendu torna chì ùn li cunveni nisun ufferta, ancu mudificata, è hà dinunziatu par asempiu l'attitudina di l'azziunariu principali Véolia, "propiu irrispunsevuli" d'appressu à ellu postu ch'ellu ùn finanzieghja micca abbastanza u pianu di salvezza di l'impiegu. Pà u STC di i marinari, i dumandi di u prucuratori ùn sò micca una surpresa di pettu à l'ufferti posti da i candidati "battendu à prò d'intaressi privati" è micca di quilli di l'impiegati è di l'usadori, corsi par asempiu.
Steti à senta à Alanu Mosconi.
Sur le même sujet
