SNCM : Michel Stefani satisfait par la réponse de Paul-Marie Bartoli ?
(A redazzioni d'Alta Frequenza) -L'Assemblea di Corsica hè dunqua adunita ssi dui ghjorni (ghjovi è vennari) pà una riunioni nova è un prugramma carcu. I cunsighjeri tarrituriali ani pussutu, com'è sempri, intarrugà l'Esecutivu duranti a seenza di i quistioni urali stamani. In u prugramma par asempiu, intarrugazioni annant'à a riabilitazioni di u Paisolu d'Aitone, paesi di vancazi sarratu in u 2002, ma dinò nant'à i fochi, imprestiti ditti tossichi, o ancu cuncirnendu a riforma di u culleghju è un periculu pussibuli pà a lingua corsa. À mezu à i cartulari bullenti, quillu di a SNCM hè statu torna trattatu largamenti par asempiu da u cumunistu Michel Stefani. Ramintendu l'ultimi evenimenti ghjuridichi cuncirnendu a cumpagnia, fora di l'ultimu di ssu marcuri, u cunsighjeru tarrituriali dici ch'ellu ùn capisci micca l'annunziu di u presidenti di l'Esecutivu di ùn pagà più u serviziu rializatu da a SNCM amintendu a Ghjurisprudenza Deggendorf, chì veni da u nomu di a sucità alimana chì, com'è a SNCM, avia toccu suvvenzioni di u so guvernu federali par asempiu. Incalchendu annant'à u fattu chì a SNCM pò bè campà, Michel Stefani hà fattu trè dumandi di primura à Paul Giacobbi, pà a cuntinuità di u serviziu publicu marittimu trà a Corsica è u cuntinenti. À i trè punti sposti da u cunsighjeru tarrituriali, Paul Marie Bartoli hà arricatu risposti chjari è corti. U presidenti di l'Uffiziu di i Trasporti hà ramintatu di sicuru chì tocca bè à a CTC di difiniscia i mudalità di u serviziu marittimu di l'isula, tuttu què in a trasparenza a più tutali è u rispettu di i reguli francesi è aurupei. Paul Marie Bartoli spera dinò ch'ellu piantarà "l'accanimentu ghjuridicu chì ghjunghji da Corsica Ferries". Michel Stefani hè statu cuntentu di a risposta di Paul Marie Bartoli ?
Steti à senta à Michel Stefani.
