SNCM: Paul Giacobbi revient sur la mise à l’étude d’une éventuelle société d’économie mixte
(A redazzioni d'Alta Frequenza) - Assemblea di Corsica è nova sissioni oghji (ghjovi). Dui ghjorni di dibattiti cù par asempiu in discussioni u famosu raportu annant'à a prutezzioni di u patrimoniu fundariu cù u dinò famosu statutu di residenti. Prima di què, un antru cartulari hè statu l'ughjettu di una quistioni urali : quillu di a SNCM. Pà Michel Stefani, dipoi l'attribuzioni di a DSP à u gruppu SNCM/CMN, "ùn c'hè nisun ghjornu senza chì ssa scelta sighi rimissa in causa". L'elettu vulia ch'ellu sighi securizatu "l'azziunariatu di a SNCM" è di guarantiscia u pianu industriali à longu andà è a cumanda à cortu andà di 4 battelli. Una presa di parolla cù a forza pà Michel Stefani pà difenda ssa cumpagnia. Una riposta à dui hè stata data pà ssu cartulari impurtanti. Paul Marie Bartoli, prima, chì aspetta una pusizioni chjara è schietta di u Statu. Ma u presidenti di l'Uffiziu di i Trasporti hà annunziatu dinò chì l'assemblea di Corsica avia lanciatu una chjama à l'ufferta annant'à una missioni d'assistenza tennica ghjuridica è finanziaria pà a criazioni di una cumpagnia righjunali marittima. Un pianu B ind'u casu chì a SNCM duvia cunnoscia prublemi impussibuli à risolva, ciò ch'ellu ùn voli micca veda. Parolli cumplittati da Paul Giacobbi. U presidenti di u Cunsighju Esecutivu hè vultatu annant'à a missa à u studiu di una pussibuli sucità d'ecunumia mista. Hà parlatu torna dinò di a situazioni di a SNCM. Ammintendu senza nisun pinseru un'errori gravi di gistioni, è fendu u paragonu trà i situazioni di a SNCM è di a CMN, Paul Giacobbi hè vultatu dinò annant'à i cundizioni chì pudariani inghjinnà ss'investimentu.
Steti à senta à Paul Giacobbi.
