SNCM: Paul-Marie Bartoli répond à Michel Stefani
(A redazzioni d'Alta Frequenza) - A SNCM : hè torna a cumpagnia marittima chì t'hà una parti maiò ind'i dibattiti è quistioni di a Cullettività Tarrituriali di Corsica. Quissa quì hè adunita pà dui ghjorni di sissioni, è stamani, i quistioni urali si sò intarissati à a prublematica di u serviziu publicu marittimu. Michel Stefani, prima, pà u gruppu cumunistu, hà intarrugatu l'esecutivu nant'à a dumanda di rimbursamentu da a cumissioni aurupea di i suvvenzioni virsati à a cumpagnia. Ind'una dumanda assai putenti, critichendu assai a Corsica Ferries, l'elettu hà vulsutu sapè s'è a CTC avia infurmatu in tempu è ora l'unioni Aurupea di u virsamentu di ssi soldi (deliberazioni di marzu di u 2006 - Aprili è ghjunghju di u 2007). Parchì, com'è hè stata ditta da Michel Stefani ind'a so dumanda, "a cumissioni spieca a so richjamazioni tardiva è micca fundata ... da un prublema di a CTC chì ùn l'avaria micca privinuta quandu ci vulia. Paul Marie Bartoli, u presidenti di l'Uffiziu di i Trasporti hè statu chjaru ssa spiecazioni di a cumissioni aurupea hè "ridicula", è rileva "di una dicisioni pulitica stampata da a marca di l'ultraliberalisimu", ..., mandendu à caternu dui fundamenti com'è quillu di u serviziu fattu. Cù spiecazioni ghjuridichi, Paul Marie Bartoli, hà dittu chì u so esecutivu ùn dumandarà micca u rimbursamentu di ssi soldi, postu ch'ellu ùn voli micca minà u colpu u più gattivu pussibuli à a cumpagnia.
Steti à senta à Paul Marie Bartoli.
