Stade Armand-Cesari : la CAB estime que le SC Bastia doit signer la convention par loyauté
(A redazzioni d'Alta Frequenza) - Ssu luni, Emile Zuccarelli, u presidenti di a Cumunità d'Agglumerazioni di Bastia hà fattu cunnoscia a so cuntintezza par via di a classificazioni in nivellu 1 di u Stadiu Armand Cesari da a Federazioni Francesi di Ballò fin'è u 2022. Rammintendu chì i vinti anni di travaghji sò custati 35 215 000 auri, cù nentru à quissi quindici millioni pagati da a sola CAB, Emile Zuccarelli hè ghjuntu in furia nant'à u tarrenu più cà difficiuli di a cunvenzioni d'occupazioni di stadiu. Ssa cunvenzioni di 25 000 auri à ogni scontru pà u SC Bastia è 12 500 pà u CA Bastia hè stata firmata da i cabisti, mentri chì u Sporting ùn ni voli micca senta parlà parchì troppu cara, una pighjoni in più essendu dumandata pà i lucali amministrativi è a buttega. Di fattu, pà Emile Zuccarelli, tocca oramai à u Sporting à adimetta a situazioni. Ùn si neguziarà micca un cuntrattu à lunghissimu andà o u prezzu di l'occupazioni, soprattuttu chì par ellu, a CAB hà assicuratu a cuntinuità di u Sporting, à traversu i travaghji di u stadiu ma dinò, par asempiu, quand'ellu hà ricumpratu u centru di furmazioni di u club in u 2010, quandu quissu quì era minacciatu di falà di modu amministrativu in CFA. Pà Emile Zuccarelli, fà pagà menu caru saria suvvenziunà u club.
Steti à senta à Emile Zuccarelli.
