Stade de Furiani : la CAB adopte une convention d'occupation jusqu'à mi-septembre
(A redazzioni d'Alta Frequenza) - Ssu ghjovi, duranti u cunsighju cumunitariu di a Cumunità d'Agglumerazioni di Bastia, u cartulari difficiuli di i cundizioni d'occupazioni di u stadiu Armand Cesari da u SC Bastia è u CA Bastia hè statu trattatu torna. Stavolta, una cunvenzioni d'occupazioni transitoria è chì ùn pò micca essa rinnuvata hè stata aduttata, chì dumanda fin'è u 15 di sittembri à u Sporting di virsà 25 000 auri par ogni scontru è à u CAB di dà 12 500 auri par ogni partita. A cunvenzioni, chì ripighja i tarmini di quilla pruposta da l'anziana maghjurità, chì avia fattu nascia a pulemica eppuru, t'hà com'è scopu di securizà à u nivellu ghjuridicu tutti i parti pà pudè dà un tempu in più pà cuncluda u studiu rializatu da un cabinetu indipindenti è chì sbuccarà annant'à una cunvenzioni chì sarà pruposta à i dui clubs à partasi di a riintrata. François Tatti, u presidenti di a CAB, hà insistutu annant'à l'impurtanza di u cartulari par via di i spesi impurtanti dumandati pà l'intrattenu ogni ghjornu, i travaghji più impurtanti o u rimbursamentu di l'imprestitu di u stadiu.
Steti à senta à François Tatti.
