Statut fiscal de la Corse : la réponse de Gilles Simeoni au groupe Corsica Libera

(A redazzioni d'Alta Frequenza) - Sissioni nova ssu vennari pà l’Assemblea di Corsica cù in u prugramma par asempiu u dibattitu d’urientazioni bughjettarii. Un dibattitu aspittatu, soprattuttu chì a maghjurità attuali avia dinunziatu  a sittimana scorsa u passivu lacatu da l’anziana maghjurità di 100 millioni d’auri. Una sissioni chì hè principiata cù un umaghju, à a dumanda di u presidenti di u gruppu Le Rassemblement, José Rossi. Una minuta di silenziu hè stata rispittata di fattu in mimoria à Robert Feliciaggi, anzianu presidenti di u gruppu di diritta Union Territoriale à l'Assemblea di Corsica, tombu u 10 di marzu di u 2006 in Aiacciu. I cunsighjeri esecutivu è tarrituriali ani participatu dopu è com'è semprià i tradiziunali dumandi à bocca. A prima hè stata posta da u presidenti di u gruppu Corsica Libera, Petr'Antò Tomasi, inghjiru à u statutu fiscali di a Corsica. Di pettu à mezu di u Statu chì si riducini à più pudè, o ancu à a situazioni finanziaria attuali di a CTC com'ella hè diunziata da l'Esecutivu, u cunsighjeru tarrituriali batti à prò, più cà mai, di una suvranità fiscali è bughjettaria. Hà ramintatu di sicuru chì l'Assemblea di Corsica s'era prununziata di dicembri di u 2014 cù una maghjurità larghissima à prò di trasferimenti di fiscalità à a Cullittività tarrituriali di Corsica. In più di què pà i naziunalisti, a nascita di una cullittività unica senza rinforzu di i cumpitenzi è di i risorzi ùn pò micca currisponda pà daveru à l'inghjochi di ciò chì pò essa qualificatu "d'uccasioni storica". U presidenti di l'Esecutivu di Corsica hà rispostu à i sfarenti intarrugazioni di u presidenti di u gruppu Corsica Libera. Gilles Simeoni hà sviluppatu tuttu un argumentariu inghjiru à trè punti : u nivellu di risorzi stessi di a futura cullittività unica, u rimpiazzamentu di certi mezi di u Statu da altri dispusitivi è a nicissità di a presa in contu più generali di u prublema in a redazzioni di l'urdinanzi chì devini cumplittà a legi NOTRe. Cuncirnendu i dutazioni di u Statu par asempiu, ùn hè più pussibuli di cuntintassini, hà incalcatu Gilles Simeoni, prima à u nivellu di u principiu, eppo di pettu à a so calata chì cuntinueghja.

Eccu l'intarvinzioni di u presidenti di l'Esecutivu di Corsica.