STC-CGT: le fossé se creuse
(A redazzioni d'Alta Frequenza) - Scambiu putenti grazia à lettari mandati à i media trà Michel Stefani è u STC. U presidenti di i Camini di Farru di a Corsica tira à balli rossi, ma cù una punta di risa malgradu tuttu, nant'à u sindicatu di i travaghjadori corsi dopu à l'azzioni rializata marcuri à a gara di Bastia.Michel Stefani trova chì u fattu di ricullà à l'anni 1980 è à l'intrapresa Femenia, hè quantunqua appena "pruvucazioni"; una lotta d'ottu anni chì avia inghjinnatu u disimpiecu di più di centu parsoni è què senza a prisenza di u STC. Rigretta a cunfusioni ind'i menti di ssu sindicatu è cundanna l'assenza d'analisi ughjettiva nant'à a situazioni ind'i camini di farru. U presidenti, rigrittendu l'ambienti pessimu nentru à l'intrapresa, critica cù forza quilli chì ùn facini cà accusà pà sciappà u travaghju rializatu è l'esecuzioni cuncreta di a cunvenzioni di sfruttera. U STC, par contu soiu, irunizeghja anch'ellu nant'à l'azzioni intrapresa da a CGT, ma di a SNCM stavolta. Tuttu què pà què ! U titulu di a lettara ni dici assai quì dinò nant'à l'ambienti nentru à l'intrapresa è trà i sfarenti forzi sindicali. Sicondu i marinari STC, nulla di cuncretu hè statu rializatu duranti a "cullata" in Parighji. Rinnovu di i battelli: solu prumessi - partenzi vulintarii: micca finanziamenti - prughjettu industriali: un veru foghju biancu - Capitali di a SNCM: ni semi sempri à chì faremi...
Sur le même sujet
