STC et acteurs du monde économique insulaire ensemble pour le service public maritime corse
(A redazzioni d'Alta Frequenza) - Attori numarosi di u mondu ecunomicu isulanu, aduniti inde sfarenti cullittivi, sò ghjunti à sustena ssu ghjovi da mani u STC di i marinari di a SNCM, chì avia lampatu una chjama pà un'adunita davanti a Cullittività Tarrituriali di Corsica. U sindicatu naziunalistu, com'ellu l'hà dighjà fatta in un cumunicatu publicatu in principiu di sittimana, hè vultatu annant'à a situazioni dramatica inde a cumpagnia, morta oramai par ellu. U STC dumanda u ritornu di a pruprietà di i battelli à a CTC è a nascita di un'entità à u capitali publicu corsu, unica struttura d'appressu à ellu chì si pudaria scantà da i logichi particulari, è di primura pà u sviluppu ecunomicu è suciali di l'isula. I raprisintanti sindicali ùn ani micca dumandatu à essa ricivuti da i membri di l'Esecutivu di Corsica, cunsidarendu ch'ellu ùn li daria micca risposti sicuri à i so dumandi, cambiendu d'avisu "tutti i quindeci ghjorni" annant'à ssu sughjettu par elli.
Steti à senta à Alanu Mosconi, pà u STC.
