Suisse : les votations qui interpellent
(A redazzioni d'Alta Frequenza) - L'elettori sguizzari ani ricusatu arimani (dumenica) via una "vutazioni pupulari", hè cusì chì hè chjamatu pà issi lochi un referendum, una pruposta da fà passà da quattru à sei settimani a durata di i riposi pagati à l'annu. L'iniziativa ghjunghjia da un sindicatu pà u quali un mesi di vacanzi ùn basta più da rifiatà dopu à a prissioni chì casca nant'à i salariati. Un affari fora di capu ind'è noi, 67% di i vutanti ani dittu d'innò à issu testu. Ci voli à sapè chì i travaghjadori sguizzari t'ani dirittu par avà, in mezana, à quattru settimani statutarii di riposi pagati, cinqui settimani, di pettu à certi intrapresi. Ci voli à sapè chì in u 2002, l'elettori aviani dighjà ricusatu una misura fendu passà a settimana di travaghju à 36 ori, contr'à i 42 ori sempri in pratica oghji. Altru puntu da rifletta ind'è noi, à l'uccasioni di un referendum tuttu altru, i Sguizzari ani aduttatu arimani un testu limitendu a custruzzioni di residenzi sicundarii, cunsidarati da parechji com'è arruvinendu i paisaghji alpini. Dopu à l'assisi di u litturali, quandu chì ci sarà ind'è noi un referendum nant'à issa quistioni difficiuli ?
