Territoriales : Corsica Libera s'exprime sur l'immigration et le peuple corse
(A redazzioni d'Alta Frequenza) - Populu corsu, integrazioni, immigrazioni è laicità. Pò essa periculosu d'amintà ssu sughjettu, ed hè cù quissu quì chì Corsica Libera hà dicisu di principià i so campagni tematichi in u quadru di i tarrituriali. Cuncirnendu u populu corsu, hè cunsidaratu da Corsica Libera com'è a sola cumunità di dirittu annant'à a tarra corsa. Un populu corsu chì u partitu voli capaci d'integrà u stragneru sfendusi di i mudelli francesi, senza perda a so natura. A citadinanza dopu à deci anni di residenza hè sempri amintata. Pà u partitu, oghji, a Corsica accogli di più parsoni chì ùn sò micca corsi ogni annu ch'ella ni pò accoglia da un simplici puntu di vista statisticu, è a gistioni di i flussi migratorii pari di primura pà l'indipendentisti, tinendu à tempu a pussibilità d'accoglia calchì decina di rifughjati in casu di crisa com'è quilla chì accadi in Siria in ssu mumentu. Infini, Corsica Libera batti à prò di una laicità chì mittissi tutti i corsi à paru, pocu impremi da induv'elli ghjunghjini è a so cunfessioni, senza nigà i radichi cristiani di l'isula.
Steti à senta à Petr'Antò Tomasi, cinquesimu di a lista Corsica Libera à i tarrituriali.
