Territoriales en Corse : José Rossi demande pour Les Républicains une investiture dès le 1er tour
(A redazzioni d'Alta Frequenza) - In una dichjarazioni di ssu vennari è ghjunta in a nostra redazzioni, José Rossi dumanda à l'istanzi dirighjenti di u so partitu Les Républicains chì un'investitura sighi accurdata à partasi di u prima ghijru di l'alizzioni tarrituriali di dicembri in Corsica. Dopu a presa di pusizioni di Nicolas Sarkozy pà assicurà l'unità di u partitu à u sicondu ghjiru, dumandendu à quissu quì è à Camille de Rocca Serra di pighjà un ingaghjamentu di fusioni di i dui listi, José Rossi stima malgradu tuttu chì "pà cunvincia è pà vincia, ci voli à andà più luntanu". "Ind'i dodeci altri regioni di Francia, una lista d'unioni "Les Républicains - UDI" pruponi à partasi di u prima ghjiru un'alternativa chjara à a pulitica catastrofica di a manca à u puteri", spiega l'anzianu ministru. "Hè dunqua di primura chì l'istanzi dirighjenti di u nostru partitu arbitressini è accurdessini un'investitura à partasi di u prima ghjiru par chì i cosi sighini chjari. Saria impussibuli di pinsà in fatti chì a Corsica, induv'elli ci sò tanti prublemi, ancu quillu di l'unità di a Republica, sighi l'unica regioni francesi induva "Les Républicains" ùn pudissini micca sprima cù forza i so cunvizzioni mubilizendusi à u prima ghjiru pà l'alternenza", compii José Rossi.
Steti à senta à José Rossi.
