Territoriales : Hyacinthe Santoni vise les 10% avec son initiative française et républicaine
(A redazzioni d'Alta Frequenza) - 10%. 15 000 voti. Un scopu chì certi pudarani qualificà d'utopicu quand'ellu si parla di a lista Debout la France chì sarà purtata da Hyacinthe Santoni, ma quissu quì, sustinutu da u leader di u partitu à u nivellu francesi, Nicolas Dupont Aignan, ci credi. U duettu hà vantatu in fatti i meriti di una candidatura contr'à i partiti tradiziunali è i sistemi clientelisti. S'è a lista ripighja parechji tematichi cumuni à tutti i candidaturi Debout la France, certi puntelli chì toccani a Corsica sò missi in risaltu. Un'uppusizioni putenti à a cuufficialità, à u statutu di residenti è a Cullittività Unica hè missa in avanti. Ma dinò prughjetti più classichi, com'è sviluppà l'ecunumia numerica è a fibra ottica, o a custruzzioni di un tunnellu trà Bastia è Aiacciu. Una supresa inveci, una prifarenza corsa ind'i marcati publichi cuncirnendu i PME è l'agricultura hè dinò missa in risaltu. Una candidatura chì adunisci parechji anziani membri o membri attuali di l'associu France-Corse, ma dinò parsoni liati à principiu à l'iniziativa morta nata di Georges Benedetti, ancu s'è Hyacinthe Santoni com'è Nicolas Dupont Aignan dicini ch'elli rispettini l'indipendentisti.
Steti à senta à Hyacinthe Santoni.
