Territoriales : Orsucci et Pieri se lancent dans la bataille "la Corse à cœur"
(A redazzioni d'Alta Frequenza) - "La Corse à Cœur"! Hè u titulu sceltu da Jean Charles Orsucci è Vanina Pieri pà purtà a so lista à a Tarrituriali da quì à calchì sittimana. S'è à mezu à i 51 nomi, parechji poni essa cunsidarati com'è "nurmali", si rimarca quantunqua calchì surpresa. Antoine Mondoloni, u presidenti di a camara di cummerciu è d'industria di Corsica o Alexandre de Lanfranchi, u direttori di l'uffiziu municipali di u turisimu d'Aiacciu ùn erani micca aspittati è sò bè piazzati, di manera rispittiva 7imu è 11imu à fiancu à Vanina Pieri, Jean Louis Luciani, parechji cunsighjeri tarrituriali è membri numarosi di Corse Social Démocrate. Simon Renucci, l'anzianu merri d'Aiacciu, ancu s'ellu ùn era micca prisenti di una manera fisica, hà sustinutu di modu ufficiali a dimarchja cù a littura di una lettara. Pari bè ch'ella sighi a "guvernenza", a manera di dirighja di Paul Giacobbi, ad avè inghjinnatu micca una rumpitura, ma in tutti i casi una vera divergenza.
Steti à senta à Jean Charles Orsucci, u capilista di "La Corse à Cœur".
