Territorialisation de la TVA : le Premier ministre y fait droit !
(A redazzioni d'Alta Frequenza) - Territurialisazioni di a TVA : u prima ministru ci faci dirittu. In un cumunicatu, u presidenti di l'Assemblea di Corsica, Ghjuvan Guidu Talamoni, priciseghja chì duranti u cungressu di Reims, Manuel Valls "hà annunziatu chì i regioni è a Cullittività tarrituriali di Corsica cunnosciarani un trasferimentu di u pruduttu di a TVA in scambiu di a Dutazioni Glubali di Funziunamentu (DGF)". "Si tratta quì di un trasferimentu di fiscalità ch'è no dumandemi dipoi dicennii (territurialisazioni di l'impusizioni)", cuntinueghja Ghjuvan Guidu Talamoni pà quali "ssa misura metti in risaltu una dimarchja di rispunsabilisazioni è di dinamisimu fiscali, chì hà da arricà mezi finanziari in più à a Corsica, parchì u pruduttu di a TVA cresci, mentri chì i dutazioni calani ogni annu". Da u puntu di vista di a missa in ballu di a misura, u presidenti spiega chì "sottu a nostra impulsioni, l'Assemblea di Corsica avia dumandatu dighjà in u 2014 chì a DGD (Dutazioni Glubali di Dicintralisazioni) sighi rimpiazzata da una somma prilevata nant'à u pruduttu di a TVA. Aviu postu tandu è fattu aduttà un amendamentu da fà chì a misura sighi allargata à a DGF". A Corsica torna una volta pricursori, ciò chì rallegra Ghjuvan Guidu Talamoni.
Sur le même sujet
