Transports maritimes : entre menace et espoir
(A redazzioni d'Alta Frequenza) - Cunflittu à a SNCM è à a CMN: s'ellu ùn ci hè nulla chì cambia, pari in tutti i casi, ùn si pò micca dì chì omu ferma senza fà nulla nentru à tutti i sferi liati à ssa prublematica. Paul Marie Bartoli, ind'una lettara racumandata cù a data di stamani (marcuri) lampa direttamenti una chjama à Marc Dufour è Marc Reverchon, i rispunsevuli i più alti di i dui cumpagnii cuncirnati. U presidenti di l'uffiziu di i trasporti parla senza svianzi: "Eti firmatu", dici quissu quì par uttena a nova dilegazioni di serviziu publicu, l'ingaghjamentu di metta in appiecazioni, à partasi di u cinquesimu ghjornu di greva, un dispusitivu chjamatu serviziu suciali è sulidariu. Ssu dispusitivu, pricisatu da l'articulu 22 di a cunvenzioni chì leia l'uffiziu di i trasporti à i cumpagnii dilegatarii, gistisci di manera assai stretta a missa in ballu di ssu serviziu suciali è sulidariu è i penalità imposti s'ellu ùn hè micca appiecatu. L'articulu 39 di ssa cunvenzioni priciseghja bè chì una penalità di trentamila auri sarà appiecata par ogni viaghju micca fattu è à l'8u ghjornu semi dunqua à un millioni seicentu mila auri. Paul Marie Bartoli và ancu di più luntanu citendu stavolt l'articulu 42 di a listessa cunvenzioni. Ss'articulu ammenta una resiliazioni pussibuli di u cuntrattu s'è u tutali di i penalità trapassa trè centu mila auri nant'à sei mesi, è l'affari vali pà i dui uparatori. Un'uparazioni simplici dimustrarà ch'è no avemi trapassatu di cinqui volti u sciffru chì pudaria inghjinnà una resiliazioni di a dilegazioni di serviziu publicu marittimu attuali. U presidenti di l'uffiziu di i trasporti compii citendu l'articulu 6 di a cunvenzioni chì metti in evidenza u fattu chì u cuntrattu ùn sighi micca rispittatu, a nova dilegazioni principiava u prima di ghjinnaghju, ciò chì ingaghja dunqua a rispunsabilità di colpa di i cumpagnii. Sempri à u nivellu di i riazzioni, ci voli à cità quilla di l’Unioni prufiziunali artisgianali di Corsica Suttana, sustinuta da a Camara di i mistieri, è a CGPME. Cundannani tutti a dituazioni attuali è dicini bè chì ùn c’era nulla chì ubligava i cumpagnii à firmà un cuntrattu chì ùn li cunvinia micca. Un milliardu d’auri nant’à 10 anni, si fistighjeghja, irunizeghja l’entità scuntenti cù champagne è tuttu u restu ; eppuru l’affari ùn sò micca strasurdinarii. L’artisgiani si riservani u dirittu di rializà qualsiasi azzioni in ghjustizia par ùn avè micca appiecatu u cuntrattu pà dumandà a so annulazioni. L’artisgiani vani ancu più luntanu punendu si a dumanda di sapè s’è un regimi di serviziu publicu ghjiniralizatu, com’è a vulia l’autorità di a cuncurrenza, ùn saria micca adattatu pà a Corsica. À u nivelli di i boni nutizii, è u forsa ùn hè micca di troppu, Frédéric Cuvillier hà annunziatu stamani chì l’urganisazioni di una riunioni saria effettiva à a fin di u dopu meziornu. U ministru di i Trasporti ùn hà micca datu ditagli in più, ma vistu a custituzioni di ssa riunioni, i direzzioni di i cumpagnii è l’azziunarii sarani assenti, ùn hè mancu appena sicuru chì calcosa di miraculosu accadissi stasera, ancu s’è u dialogu hè statu ritrovu.
