Tremblement de terre en Italie : solidarité active en Corse
(A redazzioni d'Alta Frequenza) - Dopu u tarramottu viulenti chì hè accadutu in Italia in a nuttata trà marti è marcuri, cù più di 240 morti, centunari di spariti è paesi sani distrutti, a sulidarità s'urganizeghja, in Corsica par asempiu. Hè cusì chì a CTC hà presu l'iniziativa d'impulsà è di cuurdunà i dimarchji pà purtà succorsu è assistenza à i vittimi, à i so famighji, è à tutti i parsoni tocchi da a catastrofa. U lindumani di u drama, una cellula d'urghjenza cumposta d'agenti di a CTC hè stata custituita. Ssa dimarchja hè dighjà sbuccata nant'à una prima cuncertazioni cù u Succorsu Pupulari, l'associu Per a Pace è a Croci Rossa. Dopu à ss'azzioni cumuna, un primu cunvogliu, cù magnusca, acqua è panni pudarà parti sopralocu da quì à calchì ghjornu, pà purtà ss'aiuti di prima urghjenza u più vicinu à i vittimi. Ci ni sarà d'altri in funzioni di u statu di i bisogni custatati sopralocu o spressi da l'autorità taliani. I servizi di a CTC sò à a dispusizioni di l'altri associ è di tutti i parsoni fisichi è murali chì vulariani participà à ssu slanciu di sulidarità, o chì ani dighjà cuminciatu à fallu. Nisun cuntribuzioni finanziaria hè dumandata : solu chjami à i doni pà a magnusca, l'acqua, arnesi di primi ughjenzi è panni. Un numaru d'urghjenza CTC hè missu à a dispusizioni par quissa : u 04.95.51.69.33 (ritrattu : AFP)
Sur le même sujet
