Très beau succès pour la manifestation de Parlemu Corsu
(A redazzioni d'Alta Frequenza) - Billissimu successu pà u cullittivu Parlemu Corsu chì urganizava arimani (sabbatu) una grandi manifistazioni in Aiacciu à prò di a cuufficialità di a lingua Corsa. Manifistazioni rivindicativa è fistiva avia dittu u cullittivu di u prisidenti Micheli Leccia, è a scumessa hè stata riisciuta. Davanti a prifittura di Corsica in Aiacciu prima, duva discorsi sò stati fatti accumpagnati da i voci di i scoli di cantu; annant'à a piazza di u Diamanti duva 43 gruppi, 27 sulisti è 7 squadri d'umoristi è artisti di tiatru sò passati annant'à a scena pà dumandà a missa in ballu di ssa "sucità bislingua". Una piazza ricuparta di sciarpi à i culori di u cullittivu. Artisti chì si sò scambiati i so canzoni rispittivi com'è pà fà crescia a spartera culturali. Parechji millai di parsoni, è assai assai ghjovani soprattuttu, aviani rispostu à a chjama, a dimustrazioni torna chì a Corsica si primureghja daveru di l'avvena di a so lingua. Un bellu successu dunqua pà ssa ghjurnata chì dà ancu di più creditu à u votu massicciu di l'Assemblea di Corsica à prò di a cuufficialità.
Sur le même sujet
