Un faux tsunami a semé la pagaille à Bastia ce jeudi soir
(A redazzioni d'Alta Frequenza) - Una timpesta in un bichjeru d'acqua. Un'alerta corta à u tsunami hè stata lanciata arisera da a prifittura di Corsica Suprana. In fatti, in principiu di sirata, c'hè statu un tarramottu di una forza di 6,1 annant'à a scala di Richter à u largu di a Creta. Dopu à què, un'alerta marosuli di summersioni hè ricullata fin'è a prifittura di Corsica Suprana chì, versu novi ori è mezu, hà lanciatu un dispusitivu d'urghjenza pà fà sbiutà numarosi stabilimenti in bor di mari, soprattuttu in Bastia. I risturanti di u vechju portu è di u portu di Toga si sò sbiutati di i so clienti dopu à una dumanda di i forzi di l'ordini, inde l'inchietudini pà certi, ind'a risa pà l'altri, calchì stabilimentu stendu aparti malgradu u periculu annunziatu. Infini, appena nanzi à 10 ori, a prifittura di Corsica Suprana hà cacciatu l'alerta, postu chì valutazioni più serii sariani ghjunti, cunfirmendu chì a costa urientali di a Corsica ùn risicava micca d'essa annigata, nè mancu d'essa tocca da marosuli di un'altezza sprupusitata o menu impurtanti. Infini, i soli chì ani cunnisciutu cunsiquenzi sò i risturatori, chì ani vistu i so clienti parta è guastà a so sirata par via di un'alerta chì infini sarà firmata solu un'alerta.
