Un nouveau départ pour l'incubateur régional d'entreprises innovantes
(A redazzioni d'Alta Frequenza) - Ssu marti in Bastia, i novi lucali d'INIZIÀ, struttura tarrituriali d'accumpagnamentu di prughjetti di criazioni d'intrapresi in Corsica, sò stati inaugurati. Prisenti ind'i fatti dipoi ottu anni, quissa quì pighja oghji un'andatura nova, parchì INIZIÀ ùn hè più solu oramai un fruttu di l'ADEC, ma un associu legi 1901 fundatu da a CTC, i cumunità d'agglumerazioni di Bastia è d'Aiacciu, i sfarenti camari di cumerciu è da l'Università di Corsica. U scopu hè d'arricà un aiutu finanziariu à parsoni chì portani prughjetti novi da fà chì quissi quì pudessini riescia, un asempiu à mezu à tanti altri hè quillu di un intraprenadori corsu chì s'hè lanciatu ind'a criazioni di borni pà ricaricà i vitturi elettrichi. Una struttura chì ùn hè micca riservata solu dunqua à i prughjetti chì t'ani un raportu cù a ricerca, à u cuntrariu di ciò chì si pò veda in cuntinenti. Par avà, calchì decina d'impiechi sò stati criati da i prughjetti chì a struttura hà aiutatu. Pà Jacques Pomonti, presidenti d'INIZIÀ, ssa manera nova pudaria ghjuvà à credibulizà daveru a struttura d'accumpagnamentu.
U stemi à senta.
