Un seul inspecteur pour les examens de conduite en Corse-du-Sud !
(A redazzioni d'Alta Frequenza) - Un ispittori solu pà l'asamini pà u parmissu di cunducia in tutta a Corsica Suttana ! I rispunsevuli di l'autoscoli ani vulsutu fà cunnoscia ssa situazioni pessima duranti una cunfarenza di stampa ssu marti in Aiacciu. In fatti, s'è in u 2013, c'era in u dipartimentu un dilegatu - vali à dì calchissia chì dirighjia l'ispittori, in carica di tutta a parti amministrativa è di l'urganisazioni di u spartitempu di tutti l'ispittori di l'isula par asempiu - è quattru ispittori, dipoi calchì sittimana, ferma solu un ispittori ubligatu à assicurà u travaghju di u dilegatu ma dinò tuttu ciò ch'ellu devi fà di regula. Oghji, tutti i categurii di parmissi sò tocchi, è u tempu d'attesa pà l'elevi chì volini passà u so asamini hè guasgi di trè mesi. In Corsica Suttana ogni annu, sò parechji millai d'elevi chì passani u so parmissu, è si pensa oghji chì sò parechji centunai ad aspittà chì a so sorti cambiessi. Un missaghju hè lampatu oghji da i rispunsevuli d'autoscoli à a so autorità, vali à dì a Direzzioni Dipartimintali di i Tarritorii è di u Mari, vali à dì u Statu, par chì a situazioni turnessi nurmali, ma dinò à l'elevi.
Steti à senta i spiecazioni di Pascal Rutili, chì gistisci l'autoscola Guida Corsa in Aiacciu è raprisintanti di u Cunsighju Nazinali di i Mistieri di l'Automobili.
Sur le même sujet
