Un supporter du SCB perd un oeil lors d'affrontements à Reims, neuf autres interpellés
Un supporter du SC Bastia perd un oeil lors d'affrontements à Reims, neuf autres sont interpellés
(A redazzioni d'Alta Frequenza) - Ssu sabbatu, dopu a partita trà Reims è u SC Bastia, ci sò stati baruffi trà i forzi di l'ordini è i sustenidori bastiacci in u centru cità di Reims. Novi sustenidori bastiacci sò stati arristati, è un antru hè statu feritu gravi, postu ch'ellu hà persu a vista à un ochju. Dui virsioni s'upponini. A prima, cuntata da u ghjurnali l'Union, accerta chì i sustenidori bastiacci "ani pruvucatu i pulizzeri lampendu ughjetti è cantendu slogans fascisti". A siconda, spiegata da u gruppu Bastia 1905 in un cumunicatu amenta un "agressioni di i forzi di pulizza accaniti è armati", è chì i forzi di l'ordini "ani dicisu di caricà senza circà à sapè nè maestria fin'è andà à rinvirscià unu di i nostri cù una vittura. Pà contu soiu, a Ghjuventù Indipendentista parla di un tiru di flashball à l'urighjini di a ferita gravi di un sustenidori à l'ochju, è dici chì sicondu i sustenidori prisenti sopralocu, pulizzeri chì avariani dittu à i sustenidori bastiacci "quì ùn eti da libarà à nimu. I tarruristi sò in prighjoni. U vostu Presidenti parlarà in francesi a prussima volta". U presidenti di l'Assemblea di Corsica, Ghjuvan Guidu Talamoni, hà riagitu cù un tweet sprimendu a so "sulidarità tutali cù i ghjovani Corsi agressati in Reims". Basta à cunnoscia oramai tutta a verità pà ciò chì tocca ssi baruffi.
Sur le même sujet
