Un vent de renouveau souffle sur l'espace culturel de Biguglia
(A redazzioni d'Alta Frequenza) - Siconda staghjoni pà u spaziu culturali Carlu Rocchi di Biguglia, una staghjoni tocca da u ventu di nuvità. In fatti, a municipalità di Biguglia gistisci oramai u spaziu culturali di una manera più diretta cà duranti a prima staghjoni, cù dui scopi, allargà l’ufferta à u nivellu di l’attelli pà l’abitanti di a cumuna è ancu aldilà, ma dinò tuccà un publicu più largu pà i cuncerti è i raprisintazioni tiatrali. Annant’à u prima puntu, duranti tutta sta sittimana, l’abitanti di Biguglia pudarani scopra in uparazioni porti aparti attelli musicali assai numarosi, cù un sustegnu, par asempiu, cuncirnendu u cantu pulifonicu. À u nivellu di a prugrammazioni, s’è una regula, quilla di ùn veda nisun spittaculu trapassà un prezzu d’intrata di 35 auri, hè stata appiegata, ùn voli micca dì chì l’affari sarani di poca qualità. In fatti, s’è i spittaculi di regula prugrammati in Parighji sarani sempri prisenti, com’è « Georges et Georges », ghjucati da Alexandre Brasseur è Davy Sardou, o « Père et Manque » cù Véronique Jannot in u rollu principali, u numaru d’artisti corsi prisenti hè crisciutu assai, cù, duranti a staghjoni, cuncerti di Diana di l’Alba, Maì Pesce, Cirnese o ancu Diana Saliceti à mezu à tanti altri, ma dinò raprisintazioni di u Teatru Mascone, di « Romeo e Giulietta » di u Teatrinu è altri artisti di tiatru corsi. Altra nuvità, mostri, com’è quilla chì mittarà à l’unori i figuretti di Frédéric Bertocchini, da u 1a d’uttrovi à u 14 di nuvembri.
Steti à senta à Alain Abad, u rispunsevuli di u centru culturali.
