Une délégation d'agriculteurs corses à Paris mercredi
(A redazzioni d'Alta Frequenza) - Zerga putenti di l'agricultori corsi manifistata stamani (luni) davanti i prifitturi di Bastia è d'Aiacciu. S'erani mubilizati pà dinunzià u disimpegnu tutali di u Statu cuncirnendu l'appiecazioni di a Pulitica Agricula Cumuna 2014-2020, chì duvia rimetta à nivellu l'agricultura corsa di pettu à u cuntinenti à parechji piani. Una di i rivindicazioni maiò di l'agricultori, in Pumonti è in Cismonti, tocca a parità di i Diritti à Pagamentu Unicu, à 98 auri l'ettari oghji in Corsica, mentri chì ss'aiuti sò di 220 auri pà a media naziunali. S'è in Corsica Suttana, omu s'hè cuncintratu piuttostu annant'à altri rivindicazioni tucchendu l'agricultura isulana, in Corsica Suprana, sò bè ss'aiuti pà a stallazioni di i ghjovani agricultori chì hà fattu nascia u focu. In fatti, in Bastia, l'affari ùn si sò micca passati troppu bè, postu chì i manifistanti si sò upposti à i CRS dopu chì certi avissini saltatu u purtonu di a prifittura. S'è certi ani lampatu petri, l'altri ani ripostu cù i gaz lacrimogeni, mentri chì unu di i manifistanti hè statu arristatu da a pulizza. Agricultori chì si sentini ingannati da u Statu, è soprattuttu da u ministru di l'Agricultura Stéphane Le Foll, chì avia fattu parechji prumessi duranti a so visita in Corsica calchì tempu fà. Ci saria statu calcosa di novu dopu meziornu, postu chì u presidenti di a Camara regiunali d'agricultura hà ricivutu una cumunicazioni di u ministeru. Un scontru duvaria essa privistu marcuri in Parighji.
Steti à senta à Ghjaseppu Colombani.
Sur le même sujet
