Vent fort et neige en Corse : prudence !
(A redazzioni d'Alta Frequenza) - A Corsica hè dipoi arisera (marcuri) in vigilenza aranciu pà u ventu, in vigilenza giallu pà a nevi è in vigilenza giallu dinò cù situazioni meteurulogica à surviglià pà ciò chì tocca i marosuli è summersioni marina fin’è dopu meziornu à 4 ori. U ventu di Nordu à Nordu Livanti si pesa. I valori aspittati sò trà 100 è 110 chilometri par ora è fin'è 120 è 130 chilometri par ora in buffulati, o ancu certi volti 140 chilometri par ora in muntagna, annant'à i capi i più sposti è a parti liturali Livanti di a Corsica. U ventu di Nordu inghjenna dinò una calata di i timperaturi cù nivati chì pudariani intarvena ad altitudina bassa. Ci pudaria essa a rozza ind'i settori i più sposti. Ssu fenomenu tocca a costa urientali di l'isula cù marosuli trà 4 è 5 metri, ind'i settori i più sposti. Par via di ssu gattivu tempu, a prudenza a più maiò è a vigilenza sò racumandati annant'à a strada, u liturali urientali di l'isula è in muntagna. L’arnesi spiciali sò ubligatorii pà pudè francà a foci di Vizzavona, difesa à i vitturi articulati. Nivati sò arrighjistrati dinò ind’u Centru di a Corsica.
