Vent violent et neige prévus en Corse d'ici les prochaines heures
(A redazzioni d'Alta Frequenza) - Météo France annunzia un tempu assai gattivu in Corsica, in vigilenza aranciu pà u ventu, in vigilenza giallu pà a nevi è in vigilenza giallu dinò cù situazioni meteurulogica à surviglià pà ciò chì tocca i marosuli è summersioni marina. U ventu di Nordu à Nordu Livanti si pesa à partasi di stasera à mezanotti fin'è dumani, ghjovi, in principiu di dopu meziornu. I valori aspittati sò trà 100 è 110 chilometri par ora è fin'è 120 è 130 chilometri par ora in buffulati, o ancu certi volti 140 chilometri par ora in muntagna, annant'à i capi i più sposti è a parti liturali Livanti di a Corsica. U ventu di Nordu inghjenna dinò una calata di i timperaturi cù nivati chì pudariani intarvena ad altitudina bassa. Ci pudaria essa a rozza ind'i settori i più sposti, à partasi di stasera à mezanotti fin'è dumani matina, ghjovi, à 9 ori. Ssu fenomenu hà da tuccà a costa urientali di l'isula cù marosuli trà 4 è 5 metri, ind'i settori i più sposti, à partasi di stasera à mezanotti fin'è dumani, ghjovi, à 4 ori di dopu meziornu. Par via di ssu gattivu tempu, a prudenza a più maiò è a vigilenza sò racumandati annant'à a strada, u liturali urientali di l'isula è in muntagna.
Sur le même sujet
