Vers la reconnaissance nationale du drame de Furiani ? Réaction du collectif des victimes
(A redazzioni d'Alta Frequenza) - È s'è u drama di Furiani, più di vintitrè anni dopu, era infini ricunnisciutu fora di Corsica ? Lotta di u cullittivu di i vittimi dipoi parechji anni, ssa ricunniscenza ùn hè mai stata presa in contu da i sfarenti ministri o secretarii di Statu à i Sports l'anni passendu, è missa in ballu di una manera assai timica duranti u vintesimu anniversariu ind'è l'istanzi di u ballò di pettu à l'impurtanza di a scuntintezza forti inghjinnata da a pussibilità di veda partiti ghjucassi u ghjornu di u vintesimu anniversariu di a catastrofa. Malgradu tuttu, pò nascia una bella spera parchì nant'à France Info, u Secretariu di Statu à i Sports, Thierry Braillard, amintendu a prossima riunioni cù u cullittivu di i vittimi da quì à calchì ghjornu, hà dittu ch'ellu battia à prò di una ricunniscenza naziunali di ssu drama chì ferma oghji u più murtali di u ballò francesi, diciottu parsoni sò morti dopu chì a tribuna Nordu di u stadiu Armand Cesari si ni sighi falata u 5 di maghju di u 1992. Cunsidareghja chì ssu bilanciu solu faci chì ssu drama t'hà una purtata naziunali. Ssa dichjarazioni di Thierry Braillard ùn hè micca una surpresa pà u cullittivu à quali ellu avia dighjà fattu cunnoscia a so brama. Malgradu tuttu, ssa presa di pusizioni publica hè cunsidarata com'è pusitiva da u cullittivu di i vittimi, chì aspetta oramai pruposti cuncreti duranti a prossima riunioni trà tutti i parti in Parighji.
Steti à senta à Josepha Guidicelli, a presidenti di u cullittivu di i vittimi di a catastrofa di Furiani.
Sur le même sujet
