Victor Ribeiro abattu en Haute-Corse
(A redazzioni d'Alta Frequenza) - Novu assassiniu in Corsica oghji (marti), u diciottesimu dipoi u principiu di l'annu. In principiu di dopu meziornu, Victor Ribeiro, hè cascatu sottu à i balli di unu o parechji tiradori in Corsica Suprana. I fatti sò accaduti, vicinu à una stazioni serviziu di Prunete (cumuna di Cervioni), mentri chì a vittima era partuta da un risturanti è ch'ella era in traccia di cunducia a so vittura, vicinu à quissa quì. Victor Ribeiro hè un intraprenadori stallatu in Muriani. Sicondu i primi custatazioni, saria statu feritu di modu murtali in pettu è in faccia da un fucili di caccia. U prucuratori di a Republica di Bastia hè andatu nant'à i lochi di issu novu assassiniu subbitu dopu à i fatti. L'inchiesta hè stata cunfidata à a pulizza ghjudiziaria. Dopu à iss'umicidiu, Christiane Taubira hà publicatu un cumunicatu di cundanna. A ministra di a Ghjustizia "prisenta i so cunduleenzi à a famighja di a vittima è affirmeghja torna a vulintà di u Guvernu di ristabiliscia u rispettu di i parsoni è u statu di dirittu in Corsica".
