Visite de Jean-Michel Baylet : l'argumentaire politique et technique de Jean-Guy Talamoni
(A redazzioni d'Alta Frequenza) - A visita in Corsica di u ministru di l'Accunciamentu di u Tarritoriu Jean Michel Baylet hè principiata ssu luni cù a signatura stamani di u protocollu d'accordu di a mudifica di u Cuntrattu di Pianu Statu Regioni 2015-2020. 10 millioni d'auri in più accumpagnani ssu ducumentu, finanziati à 50% da u Statu è à 50% da a CTC. Un protocollu chì privedi d'arricà migliurazioni cuncirnendu dui punti : a mubilità multimudali è un latu specificu nant'à a muntagna corsa. Una bella suddisfazioni pà Jean Michel Baylet, ancu s'è i discorsi di u presidenti di l'Assemblea di Corsica è di l'Esecutivu ùn dimustravani micca un'unanimità simuli. Di fattu nant'à a muntagna, a fiscalità o ancu nant'à u rispettu di i deliberazioni di l'Assemblea di Corsica, u ministru è l'eletti di l'isula ùn ani micca parlatu d'una voci sola. Pà Jean Michel Baylet, u Statu n'hà fattu largamenti è a cullittività unica futura n'hè a dimustrazioni a più evidenti. Ghjuvan Guidu Talamoni hà prisintatu un argumentariu puliticu è tennicu. A mudifica à u cuntrattu di pianu firmata ssu luni ùn hà micca un valori tamantu sicondu u presidenti di l'Assemblea di Corsica "ghjunghjiti solu à rendaci una parti di ciò chì c'hè statu cacciatu (cù a calata di i dutazioni di Statu)". Par ellu, for'di a fiscalità nant'à i successioni, a Corsica utteni solu risposti negativi è ricusi da a parti di u guvernu. Statutu d'isula muntagna, intercumunalità specifichi, trasferimentu à a CTC di una parti di u pruduttu di a TVA percepita in Corsica, distribuzioni nova di u soprapiù di a cuntinuità tarrituriali pà riducia i disparità trà l'urbanu è u rurali : una mansa di temi amintati da u presidenti di l'Assemblea di Corsica. Pà Ghjuvan Guidu Talamoni, s'è u metudu di u ministru hè verticali, u nostru hè "propiu orizontali".
Eccu l'intervista di u presidenti di l'Assemblea di Corsica.
