Visite ministérielle : un premier pas tout à fait exceptionnel pour Paul Giacobbi
(A redazzioni d'Alta Frequenza) - "Sò tuttu ma ùn diciaraghju nulla" ! Eccu ciò ch'ellu hà dittu stamani (ghjovi) Paul Giacobbi à a vigilia di u doppiu viaghju ministiriali di dumani è chì vidarà a visita à l'assemblea di Corsica di u ministru di l'Internu è di quilla di a Dicintralisazioni. Di sicuru, Paul Giacobbi sà di cosa sarà custituita ssa visita ministiriali parchì tuttu hè statu appruntatu bellu prima. Postu chì a tradizioni voli chì qualsiasi annunziu di un'impurtanza maiò sighi fattu da i rispunsevuli i più alti di u Statu, faci chì u presidenti di l'Esecutivu di Corsica ùn hà micca pussutu fà cunnoscia stamani ss'annunzii chì venini. Parchì si trattarà bè d'annunzii impurtanti d'appressu à Paul Giacobbi, parchì tutti i pruposti vutati da l'assemblea di Corsica sarani amintati. Statutu fiscali, lingua corsa, riforma di l'istituzioni, i dui ministri diciarani ciò ch'elli pensani è ciò ch'ellu pensa u guvernu di ciò ch'ella hà dicisu di manera demucratica è guasgi unanima l'autorità pulitica a più alta di l'isula. Un primu passu propiu eccezziunali, si vidarà bè dumani di cosa si tratta esattamenti, in tutti i casi hè ciò ch'ellu pensa Paul Giacobbi.
Steti à senta à Paul Giacobbi, u presidenti di l'Esecutivu di Corsica.
