Vote des nouvelles OSP pour le maritime: le sentiment de Michel Stefani
(A redazzioni d'Alta Frequenza) - L'Assemblea di Corsica hà aduttatu duranti u dopu meziornu stu vennari i novi ubligazioni di serviziu publicu chì gistisciarani dunqua u trasportu marittimu nant'à i porti corsi à partasi di i porti di Tulò è di Nizza. Ssu dibattitu, rammintemu la, hè vultatu inde l'attualirà dopu à l'annulazioni da u tribunali amministraitvu di l'OSP scorsi chì erani stati ghjudicati troppu "prutettrici" di pettu à a SNCM è què rammintemu la dinò dopu à un ricorsu intruduttu da Corsica Ferries. I novi ubligazioni pighjani dunqua in cunsiderazioni i mutivi d'annulazioni di quilli scorsi, è par asempiu pà ciò chì cuncerna u regimi di tarificazioni chì s'appieca à i passaghjeri chì ùn sò micca residenti è pà u trasportu di marcanzii dittu "roulant". Era u puntu essenziali di i dumandi aurupei, parchì u fattu d'impona un pezzu à ùn trapassà micca à i cumpagnii chì ùn sò micca dilegatarii di u serviziu publicu era statu ghjudicatu com'è cuntrariu à i reguli di u mumentu in Auropa. Pudemi dì dunqua chì l'assemblea di Corsica hè stata ubligata è furzata à piecà si à l'ordini furmali aurupei; un'ubligazioni chì l'esecutivu di Corsica hà assumatu di manera piena. U gruppu cumunistu, cù a voci di Michel Stefani, com'è sempri, s'hè battutu assai pà pruvà ad uppona si à i novi OSP. Quissu quì, cù una seria d'amendamenti, più di quindeci, hà pruvatu à riintruducia ubligazioni diversi pà tena u meghju pussibuli l'intaressi di a SNCM. U so primu amendamentu cuncirnendu ssu famosu prezzu chì ùn ci voli micca à trapassà essendu statu righjittatu, hà inghjinnatu a listessa sorti pà tutti l'altri amendamenti. D'appressu à Michel Stefani, l'assemblea di Corsica hà fattu un sbagliu quand'ella hà dicisu di ùn micca fà appellu di a dicisioni di u tribunali amministrativu.
Steti à senta à Michel Stefani.
