Vote du budget primitif de la CAB : la réaction d'Emile Zuccarelli
(A redazzioni d'Alta Frequenza) - Issu marcuri, a Cumunità d’Aglumerazioni di Bastia hà vutatu u so bughjettu primitivu pà l’annu 2012. Senza surpresa, u bughjettu hè statu validatu pà u cunsighju cumunitariu, è quì dinò senza surpresa, à l’unanimità menu trè voti, frà u quali quillu di Jean Baggioni. U merri di E Ville di Petrabugnu, dighjà ind’u dubbitu a settimana scorsa à l’uccasioni di u dibattitu d’urientazioni di bughjettu , hà spressu torna una volta u so disaccordu. È aldilà di l’assenza di prughjettu glubali pà contu soiu, ch’ellu avia dighjà spressu, hà dinunziatu una forma di favuritisimu ver di i cumuni di manca, a so cumuna essendu tralasciata à parè soiu da i prughjetti di a CAB. Hà criticatu dinò l’argumentazioni di a debbita di a CAB, fendu u sottu intesu chì iss’ultima frazaria soldi. A risposta di u presidenti di a CAB, Emile Zuccarelli, ùn si hè micca fatta aspittà. Spiechendu chì a suluzioni di a custruzzioni di una nova stazioni d’epurazioni è di a so reta pà 30 millioni d’auri era a suluzioni a menu sfavurevuli, s’hè mustratu stunatu di pettu à l’uffesi di Jean Baggioni. Quillu chì hè dinò merri di Bastia n’hà apprufittatu di colpu da rammintà chì pà contu soiu, prughjetti cari di sicuru ma strutturanti asistini, è chì i servizii publichi apprufittendu à tutti i cumuni di l’intercumunalità sò stati mighjurati iss’ultimi anni.
Écoutez Emile Zuccarelli
Sur le même sujet
