Vote du budget supplémentaire CTC : l'avis de Paul Giacobbi
(A redazzioni d'Alta Frequenza) - L'Assemblea di Corsica hà aduttatu infini ghjovi à sera dopu à un dibattitu abbastanza sirenu u bughjettu supplementariu à u bughjettu primitivu 2016. S'è ss'ultimu avia postu un prublema, ci arricurdemi di mumenti longhi d'attesa pà sbuccà nant'à un accordu, u dibattitu di ghjovi s'hè passatu di una più bella manera. 30 voti à prò, vali à dì 6 di più di pettu à u votu scorsu, l'unanimità ùn hè micca tutali, ma si pò dì chì u votu hè più cunfurtevuli. S'è a diritta ùn hà vutatu nè à prò nè contru in un attitudini pusitiva, u Front National hà vutatu à prò di ssu bughjettu supplementariu, cù in più di què i voti di Delphine Orsoni è d'Antoine Ottavi. Ci arricurdemi chì l'imprestitu privistu à u bughjettu primitivu nicissariu pà falla finita cù u tafonu di 100 millioni d'auri lacatu da l'anziana maghjurità era statu criticatu propiu. Un accordu trà tutti i gruppi, fora di u PC, avia parmissu una riduzzioni di 30 millioni d'auri di ss'imprestitu di fà aduttà u bughjettu primitivu, patti è cundizioni di sicuru chì a Corti di i Conti accertessi i pusitizioni missi in avanti è soprattuttu chì ecunumii impurtanti sighini rializati. Ss'accordu rispittatu hà parmissu dunqua di fà aduttà ghjovi u bughjettu 2016 inde più boni. Paul Giacobbi, chì ùn era micca prisenti ghjovi à l'Assemblea di Corsica pà raghjoni parlementarii, t'hà assai affari à dì nant'à ssu bughjettu. Aspetta anch'ellu u raportu difinitivu di a Corti di i Conti ed hè tandu ch'ellu diciarà cù pricisioni ciò ch'ellu t'hà à dì. Aspittendu què, stima chì u bughjettu prisintatu da Gilles Simeoni s'assumiglia di più à un "trompe l’œil" mediaticu cà una vera gistioni.
Steti à senta à Paul Giacobbi.
