Vote du rapport Chaubon: le sentiment de Camille de Rocca Serra

(A redazzioni d'Alta Frequenza) - 46 contr’à 5 ! U scartu hè maiò trà i difensori è l’uppunenti à a scrizzioni di a Corsica ind’a Custituzioni, porta aparta appinuccia – forsa – à una nova riforma istituziunali è i difensori putenti par ùn cambià micca. A dumanda maiò oramai hè di sapè s’è ssa dicisioni pulitica impurtanti, vutata di sicuru di manera propiu demucratica da  a raprisintazioni pulitica di l’isula, hè in leia daveru cù i brami di u populu corsu è di ciò ch’ellu aspetta. Siconda dumanda impurtanti dinò, l’assemblea di Corsica ùn hà dicisu nulla ; dumanda quì solu à u Statu di lancià una riforma di a Custituzioni, parchì ùn pò cambià nulla ella sola ben intesu. In tutti i casi, è ancu s’è no semi solu à u principiu di un prucedimentu longu – i difficultà sò sempri davanti à noi – si saparà da quì à calchì ghjornu comu u guvernu hà vistu ciò chì s’hè passatu in Corsica ssu famosu vennari u 27 di sittembri. François Hollande avia dittu à a Corsica, è l’avia ripitutu parechji volti, prupuniti è si vidarà ! Vidaremi bè s’ellu ammenta ssa quistioni duranti a so visita ind’è noi vennari chì veni. Aldilà di l’articulu 72-5, di l’articuli 73 è 74, o ancu 75 difesu da Corsica Libera, aldilà di l’aspettu tennicu di un cartulari chì sarà torna ammintatu di più in più, ci semi intarissati à un altru aspettu di i cosi. U ricordu di Jean Paul de Rocca Serra è di François Giacobbi, ssi dui parsunaghji di trinca di a vita pulitica di a Corsica di u dopu guerra, s’hè stallatu duranti u dibattitu di vennari è particularmenti nant’à l’annunziu di u votu, compiu da i sciaccamanati di 46 cunsighjeri. Ci voli à dì la, una certa emuzioni, u sintimu di campà una paghjina impurtanti di a storia di a Corsica, hà toccu l’emiciculu à u mumentu di u votu parchì tuttu u mondu hà risintutu a lunghezza di a strada chì hè stata fatta. Camille de Rocca Serra ùn l’hà micca ditta in publicu, ma l’hà ditta à u nostru micrò ; hà risintutu a listessa emuzioni cà Paul Giacobbi.

Ecoutez Camille de Rocca Serra.