Vote sur la coofficialité de la langue corse: petit rappel historique de Dominique Bucchini
(A redazzioni d'Alta Frequenza) - Tuttu u mondu a sà oramai : dipoi vennari scorsu, a lingua corsa hè divintata a siconda lingua ufficiali di l’isula. Pocu impremi di sapè chì par avà issa cuufficialità asisti solu par via di una deliberazioni di l’istanza pulitica a più alta di l’isula, è pocu impremi dinò di sapè di chì manera u guvernu hà da riceva issa dicisioni. U più impurtanti pà i corsi hè chì a so raprisintazioni pulitica, è ella sola, dessi una pusizioni chjara è difinitiva nant’à una quistioni guasgi esistenziali pà l’isula, l’affari hè fattu oramai. È què cù a manera parchì aldilà di i 36 voti à prò di u testu, nisun parsona hè andata contr’à quissu quì, ancu ind’u gruppu di diritta è ind’i republicani i più accaniti. Hè sicura chì a strada sarà longa pà uttena, o strappà, prima a custituziunalità di a dicisioni, eppo dopu a missa in piazza è u sviluppu longu di un pianu di salvezza ambiziosu. Ma par avà, è aspittendu difficultà à vena, femi puru un ritornu nant’à u mumentu cummuventi di l’annunziu di issu votu storicu. U cuncettu di cuufficialità hè statu ammintatu pà a prima volta guasgi trenta anni fà da Jean Baptiste Marcellesi è validatu da i dui federazioni di Corsica di u Partitu Cumunistu. Un picculu ritornu storicu di primura pà u presidenti di l’Assemblea di Corsica.
Ecoutez Dominique Bucchini.
