Vote sur la non-attribution de la DSP maritime: le sentiment de Michel Stefani
(A redazzioni d'Alta Frequenza) - L’assemblea di Corsica hà dunqua datu l’accordu à l’Esecutivu di Corsica è à l’Uffiziu di i Trasporti di ripighjà i neguziazioni direttamenti cù i cumpagnii maritimi senza rilancià a prucedura ditta di a chjama à l’ufferta. Rammintemu chì a chjama scorsa era stata vana par via chì l’ufferta ùn era micca adattata à a dumanda pà Corsica Ferries è par via chì u bughjettu era statu largamenti trapassatu da u gruppu CMN / SNCM. Un’unanimità tutali s’hè dunqua ingaghjata vennari dopu meziornu pà dà l’accordu à Paul Giacobbi è à Paul Marie Bartoli di ripighjà i discussioni ma nant’à un tarrenu appena di più particulari. S’è nisun rifarenza di prezzu hè stata vutata, u dirittu hè fattu cusì, si sà chì a deliberazioni aduttata priciseghja bè chì a nova attribuzioni di dilegazioni di serviziu publicu si farà à u meghju di l'intaressi ecunomichi di a CTC. Di modu chjaru, ci hè un biotu strutturali di 20 millioni d'auri inde l'uffiziu di i trasporti è ci voli ad ecunumizà più cà tuttu issi 20 millioni à l'annu pà prisintà un bughjettu equilibratu. S'è tuttu si passa bè, l'uffiziu di i trasporti pudaria sceghja un dilegatariu versu a fini di lugliu; à u peghju, a data di u 30 di sittembri hè stata ammintata. Semi dunqua luntanu da i 107 millioni d'auri vulsuti da u gruppu di i cumpagnii marsighjesi è finalmenti u prezzu finali duvaria essa trà 87 è 90 millioni d'auri. Com'è sempri, u gruppu communiste et front de gauche hè statu assai prisenti inde issu dibattitu. Michel Stefani hè bè cuscenti di i difficultà bughjettarii di l'uffiziu di i trasporti com'è di quilli di i cumpagnii maritimi. Credi malgradu tuttu ind'una bella crescita di a somma pà a cuntinuità tarrituriali chì parmittaria di migliurà bè a situazioni finanziaria di l'uni è di l'altri.
Écoutez le président du groupe front de gauche, Michel Stefani.
Sur le même sujet
