Xylella Fastidiosa : Jean-Louis Luciani répond à Femu a Corsica
(A redazzioni d'Alta Frequenza) -L'Assemblea di Corsica hè dunqua adunita ssi dui ghjorni (ghjovi è vennari) pà una riunioni nova è un prugramma carcu. Muzioni impurtanti sarani posti par asempiu, com'è annant'à l'aduzzioni di una legi d'annistia, a SNCM è a Xylella Fastidiosa. Ma prima, i cunsighjeri tarrituriali ani pussutu, com'è sempri, intarrugà l'Esecutivu duranti a seenza di i quistioni urali stamani. In u prugramma par asempiu, intarrugazioni annant'à a riabilitazioni di u Paisolu d'Aitone, paesi di vancazi sarratu in u 2002, ma dinò nant'à i fochi, imprestiti ditti tossichi, o ancu cuncirnendu a riforma di u culleghju è un periculu pussibuli pà a lingua corsa. Una dumanda di primura hè stata posta stamani da Nadine Nivaggioni, à nomu di u gruppu Femu a Corsica, annant'à un sughjettu assai caldu : a lotta contr'à a Xylella Fastidiosa. I naziunalisti dumandani più cà mai misuri d'urghjenza, com'è quilli prisintati inde l'arrestu alternativu di u cullittivu Xylella Fastidiosa di pettu à quillu di u prifettu di Corsica chì ùn basta ancu d'appressu à elli. Azzioni ch'ellu ci voli à purtà inde tempuralità diffarenti, à cortu, mezu è longu andà. Femu a Corsica hà prisintatu dunqua à u presidenti di l'ODARC, Jean Louis Luciani, una dumanda di scrizzioni à un prugramma aurupeu, in cullaburazioni stretta cù a regioni di i Pugli in Italia, particularmenti tocca da u batteriu. In risposta à a dumanda di a cunsighjera tarrituriali naziunalista, Jean Louis Luciani hà fattu sapè chì l'ODARC ferma in cuntattu cù spicialisti di a regioni taliana di i Pugli. Hà fattu sapè ch'ellu era pà a criazioni di un prugramma specificu chì parmetti bè d'intruducia ind'i lochi infettati spezii specifichi, ghjunghjendu da u mondu vegetali isulanu. U presidenti di l'Uffiziu di Sviluppu Agriculu è Rurali di a Corsica spera dinò a missa in ballu di misuri più siveri è pricisi annant'à u tarritoriu corsu, pà parà ssu dannu.
Steti à senta à Jean Louis Luciani.
Sur le même sujet
