Xylella Fastidiosa : la bactérie est arrivée en France
(A redazzioni d'Alta Frequenza) - Ciò chì duvia accada, hè accadutu : a Xylella Fastidiosa, u batteriu chì tomba par asempiu l'alivi, hè in Francia. Hè statu identificatu pà a prima volta in una piantina di un arburu à caffè trovu in u marcatu di Rungis, u prima marcatu di grossu aurupeu, vicinu à Parighji, hà annunziatu marcuri u ministeru di l'Agricultura. Ssi piantini sò stati intrudutti da l'Ollanda inde l'Unioni aurupea, è ghjunghjariani d'America Cintrali, priciseghja dinò ss'ultimu. A Xylella Fastidiosa, chì sterpa parechji spezii vegetali in i Pugli, in u meziornu di l'Italia dipoi dui anni, cumencia à inchietà a Francia, chì hà dicisu calchì ghjornu fà di pighjà misuri naziunali. In Corsica, hè più di un annu chì ssa minaccia hè cunsidarata d'una manera seria, di pettu à a vicinanza cù a parti suttana di l'Italia, è u cullittivu Xylella Fastidiosa, cù ss'evenimentu ricenti, lampa una chjama torna più forti, prima chì ssu dannu ghjunghjissi annant'à l'isula. Dumanda torna à a Francia è à l'Auropa di pighjà misuri siveri pà cunfinà eppo pà pruibiscia l'impurtazioni di i piantini ghjunghjendu da lochi o paesi induva u batteriu faci disguasti. Un missaghju chì sarà passatu torna una volta grazia à a prisenza a dumenicata chì veni in Bastia di u diputatu aurupeu, José Bové, chì s'hè impatrunitu di u cartulari.
Steti à senta à Saveriu Luciani, cunsighjeru tarrituriali Femu a Corsica, chì faci parti di u cullittivu Xylella Fastidiosa.
Sur le même sujet
