Xylella Fastidiosa : vers des avancées ?
(A redazzioni d'Alta Frequenza) - À u mesi d'aostu, Femu a Corsica avia lampatu una chjama forti à u Statu cuncirnendu u prublema di a sparghjera di un batteriu chì tocca è tomba parechji spezii vegetali in Italia suttana, a Xylella Fastidiosa. Ramintemi chì ssu batteriu si trasmetti soprattuttu grazia à insetti vettori è si diffuseghja in furia. Par avà, ùn asisti micca trattamentu fora di strappà è di distrughja i pianti cuntaminati, è un cuntrollu di i pupulazioni d'insetti chì u trasmettini. U risicu maiò di dissiminazioni hè a multiplicazioni, l'espurtazioni è u trasportu di i pianti vegetali cuntaminati. Pà Femu a Corsica, a Xylella Fastidiosa hè dunqua una minaccia diretta pà a Corsica, postu chì l'isula faci ghjunghja parechji pianti pà i prufiziunali o pà l'urnamentazioni, par asempiu da u meziornu di l'Italia è di a Spagna. Grazia à l'iniziativa di u partitu naziunalistu, un cullittivu hè statu custituitu dopu à una prima riunioni di travaghju in A Riventosa. Quissu quì s'hà da aduniscia ssu marti à 5 ori in Corti pà pudè dibatta di pruposti cuncreti annant'à ssu sughjettu. Femu a Corsica avia mandatu un missaghju à u Statu, rispunsevuli di a prutezzioni di i vegetali di pettu à ssu risicu pussibuli maiò, è pari chì oghji l'affari cumincessini à mova. In fatti, a Direzzioni Righjunali di l'Alimentazioni, di l'Agricultura è di a Furesta hà da urganizà ssu marcuri un scontru cù i camari d'agricultura è parechji prufiziunali.
Steti à senta à Saveriu Luciani, cunsighjeru tarrituriali Femu a Corsica.
Sur le même sujet
