Yvan Colonna entendu comme témoin dans l'affaire Antoine Sollacaro
(A redazzioni d'Alta Frequenza) - L'emi imparatu oghji (marti), Yvan Colonna hè statu intesu com'è tistimoniu ss'istati ind'u quadru di l'inchiesta annant'à l'assassiniu d'Antoine Sollacaro. Hè ciò ch'ellu hà dittu u so avvucatu Pascal Garbarini annant'à RTL. Ramintemi chì Antoine Sollacaro hè statu l'avvucatu d'Yvan Colonna è l'hà difesu duranti i so sfarenti prucessi. Ss'audizioni hè stata rializata da inchiestadori di a pulizza ghjudiziaria d'Aiacciu è s'hè passata ind'a cintrali d'Arles, induv'ellu hè incarciaratu Yvan Colonna à perpetuità pà l'assassiniu di u prifettu di Corsica Claude Erignac. Pascal Garbarini hà dittu par asempiu chì ss'audizioni "hè propiu una surpresa è ùn hè micca ghjustificata. Tuttu u mondu sà chì i rilazioni trà un clienti è u so avvucatu sò sicreti". Sempri d'appressu à l'avvucatu, dunqua, Yvan Colonna ùn hà micca rispostu à l'inchiestadori. Pà Pascal Garbarini, "si tratta di un'ipotesi nova, è ùn hè chjara quant'è a prima". "Yvan Colonna hè imprighjunatu dipoi u 4 di lugliu di u 2003, ùn sà nulla dunqua annant'à ss'affari", hà dittu l'avvucatu pà compia.
Sur le même sujet
